Te Kura Kaupapa Māori o Te Rito

Nō te Iwi, Mō te Iwi, Tō te Iwi

I te tau 1990 i tīmata ai a Te Kākano o Te Kura Kōhanga Reo i roto i ngā kainga o ngā whānau taketake hei puna kōhungahunga, hei puna whakatupu i te reo o ō tātou tūpuna. Otirā i whai whakaaro kē aua whānau kia whakatū he Kura Kaupapa Māori i Ōtaki

I te tau 1991 i timata ai a Te Kura Kaupapa Māori o Te Rito ki te marae o Katihiku, kātahi ki Te Wānanga-o-Raukawa.

I te marama o Whiringa-a-nuku i te tau 1991 I hūnuku mai a Te Kura Kaupapa Māori o Te Rito ki te tīriti o Te Rauparaha.

Nā Te Arawa ngā whare i tomo, nā rātou hoki te kawa i tā kia rūmakihia te whenua i te reo Māori.

Ko Ngā Mahi ā ngā Tūpuna te tūāpapa mō Te Kura Kaupapa Māori o Te Rito.

I te marama o Hakihea i te tau 1991 i whai mana ai tō mātou Kura Kaupapa Māori i raro i ngā manaakitanga o te Tāhuhu o te Mātauranga.

I te tau 1995 i whakatūria ai Te Wharekura o Te Rito hei kura tuarua mō ā mātou tamariki. I taua tau tonu i whakauru ngā tauira o te Wharekura ki roto i ngā tohu o Te Wānanga-o-Raukawa.


Tēnā anō tātou i ngā āhuatanga tuatinitini o te wā.

Nau mai ki te paetukutuku o Te KKM o Te Rito. E rere arorangi ana ngā whakaaro ki ngā mate kua riro ki te murau o te tini, ki te wenerau a te mano. E koutou rā kua nunumi atu ki ngā tatau a Hinenuitepō, waiho mā te hunga ora koutou e tangi, e poroporoākī. Kāti.

Nā ngā pānga me ngā āhuatanga o te mate urutā o COVID-19 e hora whānui ana, kua oti ngā pouako o te kura ki te whakariterite i ngā mahi akoako mō ā rātou ākonga kia tutuki ai ki ngā kāinga. Kei te whārangi paetukutuku a tēnā pouako, a tēnā pouako ngā mahi (mō ngā reanga tuākana nei mai i te Whānau Mana, pakeke ake ki te Wharekura). Mō ngā akoranga o te Whānau Wehi me te Whānau Ihi, he mahi anō kua whakarite mā rātou, kei ō rātou pouako (Whaea Hinekura rāua ko Whaea Hinewa) ngā mahi. Kua whakaritea ngā mahi mō te roa o te wiki. Kei ngā whārangi o ngā reanga ngā tohutohu hei whai mā ngā tamariki me ngā mātua. Heoi, mēnā he pātai tā ngā mātua mō ngā akoranga a ngā tamariki, me whakapā atu ki te pouako o tāu tamaiti.

Kāore e kore kei te mānukanuka, kei te āmaimai ētehi whānau ki ngā kōrero o te wā e pā ana ki te mate urutā nei. Ko te mea nui mō tātou i tēnei wā, kia noho haumaru ō tātou whānau, manaakitia ō tātou kaumātua, āwhinatia te hunga tūroro, haumarutia ā tātou tamariki mokopuna ki ngā kāinga, kia kaha ki te horoi i ō tātou ringa me te ūwhi i te waha inā maremare ana.  

Kia kaha tātou i tēnei wā, he wā pai tēnei kia noho piripiri ai ngā whānau, kia kotahi anō ai i tēnei wā o te māuiui. Whāia ngā tikanga haumaru kua tukuna whānuitia, kia whai whakaaro nui ki te tangata, ahakoa ko wai, e taukītia ai te kōrero, he kura te tangata.


TE WĀTAKA A TAU KURA

2022-2024 WĀTAKA A TAU TE RITO.xls

TE WĀTAKA A TAU WHAREKURA

2022-2024 WĀTAKA A TAU WHAREKURA.xls

Mānawatia a Matariki, Mānawatia te Reo!

Ko Matariki anō tērā te tōtō mai i ngā whānau o te kura ki runga o Pukehinahina. I whai wāhi ngā raukura ki te hapai i ngā kawenga ōkawa, te karakia me te karanga ki ngā whetū e iwa o te kāhui o Matariki. I mihia ngā mate o te tau, i tū ngā tamariki ki te taki karakia ki ngā whetū, i tukuna te hautapu ki ngā whetū kātahi i noho tahi te whānau whānui ki te hakari. 

I te tau nei i whakarewahia tō tātou kura reo tuatahi - i tae mai ngā raukura, ngā whānau tawhito, ngā whānau onāianei, ngā whānau ō tō tātou kōhanga reo hoki ki tēnei kaupapa whakahirahira - kāore e ārikarika ngā mihi ki ngā kaiako, ngā raka o te kaupapa nei. 


Te Rito Manako Nui, Matariki Hunga Nui E!

I tēnei tau 2022, i whakanuia te kaupapa o Matariki e te motu whānui. Kua roa tō tātou kura e whakanui ana i tēnei wā o te tau, i tēnei kaupapa, i ēnei tikanga ā kui mā, ā koro mā. 

I whakarite te kura i  tētehi pakipūmeka i tēnei tau ki te hopu i tā tātou kaupapa whakanui i a Matariki. He taonga tēnei mō tā tātou kura, mō ngā reanga whakatupu e haere ake nei me te manako nui ka whanake tonu tā tātou kaupapa rangatira nei. 

He mihi tēnei ki a Peniamine Heta (ētita) rātou ko Te Ākauroa Jacob (kaihopu kiriata), ko Hape Cook Porter (kaihopu kiriata), koutou ngā ringa toi i āta waihanga mai i tēnei o ngā pakipūmeka hei taonga tuku iho mō tō tātou whānau.